Sumarliði fæddist í Keflavík á 20.öldinni, fimmta barn foreldra sinna en engu að síður miðjubarnið í systkinaskaranum. Hann myndi seint kalla sig Keflvíking þar sem hann hefur í gegnum ævina flutt út um allt land og allan heim með nokkurra ára millibili. Hann fór í grunnskóla í Keflavík og á Egilsstöðum og gekk svo í þrjá menntaskóla áður en honum tókst loksins að klára stúdentinn. Hann hefur auk þess búið í Danmörku, Svíþjóð, Englandi, Texas, Frakklandi og á Kýpur og hefur mjög gaman af því að kynnast nýjum menningarheimum og tungumálum, en til viðbótar við íslensku talar hann ensku, frönsku, dönsku og sænsku!

Árið 2011 kláraði Sumarliði leiklistarnám í Rose Bruford leiklistarskólanum í London og strax eftir útskrift gekk hann til liðs við Leikhópinn Lottu sem staðgengill Adda í hlutverki vondu drottningarinnar í ævintýrinu um Mjallhvíti. Hann stökk svo í skarðið fyrir Stebba í Stígvélaðikettinum árið eftir, fyrir Baldur í Gilitrutt 2013 og svo aftur fyrir Stebba í Hróa Hetti árið 2014. Árið 2017 lék hann titilhlutverkið í Ljóta andarunganum og 2019 lék hann hluta úr sumri í Litlu Hafmeyjunni á móti Stebba og Árna Beinteini. Árið 2023 lék hann Litla kiðakið, Freyju á Bakka og Fuglinn fljúgandi í 10 ára afmælisuppsetningu Lottu á söngleiknum Gilitrutt. Árið 2024 lék hann Jakob Kristófer og Kaninku í söngleiknum Bangsímon og sumarið 2026 mun hann ferðast um landið með hópnum í hlurverkum Geisla og Blæs í söngleiknum Litalandi.

Sumarliði hefur tekið sér ýmis hlutverk innan leikhópsins og má þar nefna leikmunagerð, leikmynd, skipulagningu, jú og svo bjó hann til þessa heimasíðu með Helgu Ragnars hljómborðsleikara!

Þessa dagana býr hann með eiginmanni sínum í Þingholtunum og kennir leiklist og leikstýrir hjá Fjölbrautaskólanum við Ármúla og Leynileikhúsinu. Í frístundum finnst honum gaman að ferðast innan-sem utanlands, sprella eitthvað skemmtilegt í góðra vina hópi, ganga um fjöll og firnindi og svo á hann það til að gleyma sér í góðum tölvuleik.